Banka Qendrore e Republikës së Kosovës (BQK) ka paralajmëruar qytetarët për rritjen e mashtrimeve online që përhapen përmes mesazheve SMS dhe aplikacioneve të komunikimit. Në këto mesazhe, që vijnë nga numra ndërkombëtarë, ofrohen mundësi investimi me përfitime të larta, duke ftuar njerëzit të bashkohen në grupe investimesh përmes lidhjeve të jashtme. BQK-ja këshillon që të mos klikohen këto lidhje, të mos jepen të dhëna personale apo financiare dhe të mos kryhen pagesa në bazë të këtyre ftesave, pasi ato mund të jenë mashtruese. Në disa raste, aplikacionet e komunikimit vetë paralajmërojnë përmbajtje të dyshimta, por qytetarët duhet të jenë gjithmonë të kujdesshëm dhe të shmangin çdo kontakt me mesazhe të panjohura.