Administrata Tatimore e Kosovës (ATK) ka paralajmëruar tatimpaguesit për mesazhe SMS të rreme që po qarkullojnë në emër të saj, të cilat lidhen me rimbursimin e tatimit. ATK thekson se këto mesazhe nuk janë dërguar nga institucionet zyrtare dhe kërkon nga qytetarët të jenë të kujdesshëm, duke mos klikuar në lidhje të dyshimta apo ndarë të dhëna personale dhe bankare. Përmes një postimi në Facebook, ATK apelon që çdo informacion të verifikohet vetëm përmes kanaleve zyrtare të institucionit. Ky paralajmërim synon të mbrojë tatimpaguesit nga mashtrimet dhe dezinformatat që mund të shkaktojnë dëme financiare.