Gjatë vitit 2025, Ministria e Mbrojtjes ka shpenzuar rreth 201.8 milionë euro, duke përdorur 96% të buxhetit të saj, por raporti i Zyrës Kombëtare të Auditimit evidenton probleme serioze në kompensimin e kujdestarive të pjesëtarëve të Forcës së Sigurisë së Kosovës (FSK). Pavarësisht se buxheti për paga dhe mëditje është shfrytëzuar pothuajse në tërësi, Ministria ka paguar kujdestaritë vetëm për muajin janar, ndërsa për pjesën tjetër të vitit ka aplikuar kompensim me ditë pushimi, duke justifikuar këtë me nevojën për të mos penguar aktivitetet operative të FSK-së.