Aleanca Kosovare e Bizneseve (AKB) përshëndet marrëveshjen e arritur ndërmjet fermerëve të qumështit dhe Ministrisë së Bujqësisë, si dhe rifillimin e grumbullimit të qumështit nga kompania Vita, duke e konsideruar këtë një zhvillim pozitiv për fermerët, industrinë dhe ekonominë vendore. Megjithatë, AKB kritikon institucionet për vonesën në dialogun institucional, që solli tensione, humbje financiare dhe dëme në zinxhirin e prodhimit vendor, duke theksuar se protesta nuk duhet të ishte çmimi për t’u dëgjuar zëri i fermerëve. Organizata kërkon nga Ministria e Bujqësisë të analizojë përgjegjësitë institucionale dhe të krijojë mekanizma bashkëpunimi të përhershëm me fermerët dhe bizneset për të parandaluar situata të ngjashme në të ardhmen. AKB nënvizon se çdo ditë bllokade shkakton humbje për fermerët, industrinë dhe konsumatorët, dhe se dialogu në kohë është thelbësor për mbrojtjen e prodhimit vendor dhe zhvillimin ekonomik të Kosovës.