Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka njoftuar për kontrolle intensive në treg gjatë marsit 2026, ku janë realizuar mbi 600 inspektime në derivate, markete dhe produkte, me fokus të veçantë në sigurinë e produkteve dhe mbrojtjen e konsumatorit. Gjatë këtyre kontrolleve janë trajtuar 129 ankesa, janë shqiptuar 56 gjoba, mbyllur 10 lokale, ndërsa janë sekuestruar mbi 41,500 lodra dhe pajisje të pasigurta, si dhe janë larguar mbi 500 pajisje makinerike nga tregu. Kontrolli është bërë në bashkëpunim me Administratën Tatimore dhe Autoritetin e Konkurrencës, duke përfshirë edhe inspektime të përbashkëta dhe verifikime të cilësisë së produkteve si vajrat motorikë. Ministrja theksoi se abuzimet me çmime, cenimi i sigurisë së produkteve dhe mashtrimi i konsumatorit nuk do të tolerohen, duke dërguar një mesazh të qartë për operatorët ekonomikë në Kosovë.