Lidhja e Bizneseve të Kosovës ka reaguar lidhur me kontrollet e fundit të sigurisë ushqimore në kompaninë Vita, duke kërkuar që inspektimet të jenë profesionale, proporcionale dhe të bazuara në fakte shkencore. Organizata mbështet ushtrimin e kompetencave ligjore të institucioneve përgjegjëse, por shpreh shqetësim për mënyrën se si është organizuar dhe prezantuar inspektimi, i cili ka krijuar perceptimin e një situate emergjente pa pasur ende rezultate përfundimtare laboratorike. Rezultatet e analizave të muajve prill dhe maj konfirmojnë se produktet e Vita-s janë në përputhje me standardet, ndërsa mostrat e marra më 2 korrik janë ende në proces dhe nuk duhet të bëhen vlerësime të parakohshme. Lidhja paralajmëron se veprime të pa balancuara mund të dëmtojnë reputacionin e bizneseve, besimin e konsumatorëve dhe klimën e investimeve, duke ritheksuar nevojën për kontrolle të rregullta, transparente dhe të paanshme që mbrojnë shëndetin publik dhe prodhuesit vendorë.