Maqedonia e Veriut është bërë zyrtarisht pjesë e Korridorit Vertikal të gazifikimit, një iniciativë që lidh sistemet energjetike të vendeve të Evropës Juglindore dhe Qendrore. Memorandumin e nënshkroi në Selanik drejtori i NOMAGAS-it, Nedim Rama, pas një procesi të gjatë negociatash dhe koordinimi rajonal. Anëtarësimi në këtë korridor i ofron vendit mundësi të reja për diversifikimin e furnizimit me gaz, uljen e varësisë nga një burim i vetëm dhe forcimin e pozitës së tij në rrjetin energjetik rajonal. Sipas partisë VLEN, kjo nismë është një hap i rëndësishëm për sigurinë energjetike dhe ekonominë e Maqedonisë së Veriut, duke reflektuar mësimet nga kriza energjetike e viteve të fundit.