Sipas të dhënave të fundit të Eurostatit, Maqedonia e Veriut renditet ndër vendet me javën më të gjatë të punës në Evropë, me një mesatare prej 39.5 orësh në javë. Kjo shifër është shumë më e lartë se mesatarja e Bashkimit Evropian prej 35.9 orësh dhe afër vendeve si Greqia dhe Serbia. Ekspertët vënë në dukje se faktorë si produktiviteti i ulët, fuqia e kufizuar negociuese e punëtorëve dhe sistemet e ndryshme të rregullimit të kohës së punës ndikojnë në këto dallime. Gjithashtu, dallime të mëdha vërehen edhe ndërmjet sektorëve të ndryshëm ekonomikë, ku punëtorët në bujqësi, pylltari dhe peshkim punojnë më shumë se ata në sektorët e shërbimeve apo administratës.