Gjatë punimeve të modernizimit në njësitë gjeneruese të termocentralit “Kosova B”, Korporata Energjetike e Kosovës (KEK) ka ndërmarrë masa standarde parandaluese për trajtimin e materialeve izoluese të identifikuara në zonën e punimit. Ekspertë gjermanë kanë marrë mostra për analiza profesionale, ndërsa është kërkuar edhe mbështetja e ekipeve të specializuara të Forcës së Sigurisë së Kosovës për verifikime shtesë dhe për respektimin e standardeve më të larta të sigurisë. KEK thekson se nuk ka asnjë rrezik të evidentuar, asnjë punonjës të lënduar apo të prekur në aspektin shëndetësor, dhe janë ndërmarrë të gjitha masat e nevojshme për mbrojtjen e punëtorëve dhe vazhdimësinë e sigurt të punimeve. Korporata mbetet e përkushtuar ndaj sigurisë së punonjësve dhe informimit transparent të publikut për çdo zhvillim në këtë proces.