Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari, ka theksuar se mbështetja institucionale për gratë ndërmarrëse do të vazhdojë dhe do të intensifikohet. Ajo ka prezantuar aktivitetet e zhvilluara deri tani, përfshirë konferencën "She Rises" me 300 pjesëmarrëse, si dhe mekanizmat e ndihmës financiare dhe promovimit të produkteve të grave në biznes. Kusari ka paralajmëruar edhe iniciativa të reja, përfshirë dispozita ligjore që do të favorizojnë prodhimin vendor dhe gratë ndërmarrëse në tregtinë e brendshme. Ndërkaq, zëvendësambasadorja gjermane Silke Bellmann ka shprehur mbështetjen e shtetit të saj për këtë iniciativë, duke theksuar rëndësinë e fuqizimit ekonomik të grave për zhvillimin e qëndrueshëm të komuniteteve dhe konkurrencën e bizneseve në Kosovë.