Sipas të dhënave të fundit nga Agjencia e Statistikave të Kosovës, mbi 51.6% e popullsisë në moshë pune janë jashtë tregut të punës, me një shkallë papunësie prej 13.9%. Situata është veçanërisht shqetësuese te gratë, ku 65.4% janë joaktive ekonomikisht dhe 79% e grave aktive në kërkim të punës rezultojnë të papunësuara. Kryetari i Aleancës Kosovare të Bizneseve, Agim Shahini, ka reaguar duke e cilësuar këtë situatë si dëshmi të dështimit të politikave ekonomike dhe sociale, duke theksuar se Kosova po humb potencialin e saj njerëzor dhe mbështetet kryesisht në remitenca dhe konsum, pa një bazë të fortë prodhuese. Punësimi mbetet i përqendruar në sektorë të kufizuar si tregtia, prodhimi, ndërtimtaria, arsimi dhe administrata publike, ndërsa ekziston një hendek i madh mes numrit të të punësuarve sipas statistikave zyrtare dhe atyre që paguajnë kontribute pensionale.