Oda e Hotelierisë dhe Turizmit të Kosovës (OHTK) dhe Organizata e Veteranëve të Luftës së UÇK-së (OVL-UÇK) kanë nënshkruar një memorandum bashkëpunimi me qëllim mbështetjen e veteranëve, invalidëve, familjeve të dëshmorëve dhe anëtarëve të tyre. Marrëveshja përfshin mundësi për akomodim të delegacioneve, organizim trajnimesh, konferencash dhe aktivitete të përbashkëta në të gjitha regjionet ku vepron OHTK. Kryetari i OHTK, Hysen Sogojeva, theksoi se kjo iniciativë synon të ofrojë ndihmë praktike në akomodim dhe trajnime profesionale për kategoritë e luftës, duke përfshirë edhe fëmijët e tyre. Nga ana tjetër, kryetari i OVL-UÇK, Hysni Gucati, vuri në dukje sfidat e vazhdueshme me institucionet shtetërore, duke kritikuar mungesën e përkrahjes dhe realizimit të kërkesave ligjore për trajtimin shëndetësor të veteranëve dhe familjeve të dëshmorëve.