Ministria e Shëndetësisë ka mirëpritur raportin e auditimit për vitin 2025, i cili konfirmon një opinion të pamodifikuar për pasqyrat financiare të institucionit. Ky opinion tregon se pasqyrat paraqesin një pamje të drejtë dhe janë përgatitur në përputhje me standardet dhe legjislacionin në fuqi, ndërsa transaksionet e kryera janë realizuar sipas kritereve ligjore. Raporti evidenton disa fusha që kërkojnë përmirësime në menaxhimin dhe dokumentimin e proceseve administrative, të cilat Ministria i trajton me prioritet duke ndërmarrë veprimet e nevojshme brenda afateve. Gjithashtu, është vlerësuar zbatimi i plotë i rekomandimeve të vitit paraprak, duke dëshmuar përkushtimin për forcimin e kontrollit të brendshëm, transparencës dhe llogaridhënies në shërbim të qytetarëve.