Ministrja e Tregtisë, Industrisë, Ndërmarrësisë dhe Inovacionit, Mimoza Kusari-Lila, ka nënshkruar iniciimin e procedurës për Projektligjin për masat e përkohshme të produkteve themelore në rast të krizave ekonomike, i njohur si “Ligji për çmimet tavan”. Ky projektligj synon të krijojë një bazë ligjore për ndërhyrje të shpejtë dhe të drejtë në rast të rritjes së papritur të çmimeve, mungesës së produkteve themelore apo çrregullimeve në furnizim, duke mbrojtur qytetarët nga abuzimi dhe spekulimi në kohë krize. Ministrja theksoi se masat janë të përkohshme, proporcionale dhe të orientuara drejt ruajtjes së stabilitetit ekonomik, ndërsa projektligji adreson edhe vërejtjet e mëparshme të Gjykatës Kushtetuese duke krijuar një kornizë ligjore më të fortë dhe të qëndrueshme. Ky hap vjen pas miratimit të agjendës legjislative në Qeverinë e Kosovës dhe është pjesë e premtimit të Kryeministrit Albin Kurti për miratimin e këtij ligji që në fillim të mandatit të ri, ndërsa tani pritet shqyrtimi në Qeveri dhe procedimi në Kuvend për miratim.