Ministria e Industrisë, Ndërmarrësisë, Tregtisë dhe Inovacionit (MINTI) po monitoron me kujdes rritjen e çmimeve të derivateve të naftës në Kosovë dhe ka intensifikuar inspektimet në terren për të parandaluar abuzimet dhe mashtrimet nga operatorët ekonomikë. Duke qenë se Kosova është vend importues, çmimet e derivateve reflektojnë lëvizjet ndërkombëtare, por ato duhet të jenë në përputhje me Ligjin nr. 08/L-018 për Tregtinë me Produkte të Naftës dhe Karburanteve të Ripërtërishme. Ministria paralajmëron se në rast të luhatjeve të menjëhershme dhe të pajustifikuara të çmimeve, do të shqyrtojë marrjen e vendimeve për rregullimin e çmimeve dhe masa të tjera mbrojtëse, duke përfshirë edhe mbikëqyrjen nga Dogana dhe Administrata Tatimore e Kosovës. Qytetarët janë ftuar të raportojnë çdo parregullsi apo mashtrim në numrin pa pagesë 0800 11000 ose në emailin zyrtar konsumatori@rks-gov.net, ndërsa Ministria thekson përkushtimin e saj për mbrojtjen e konsumatorit dhe rritjen e transparencës në treg.