Ministria e Industrisë, Ndërmarrësisë, Tregtisë dhe Inovacionit (MINTI) ka shtuar masat për mbrojtjen e konsumatorëve duke themeluar një komision ad hoc për verifikimin e njehsorëve elektrikë, pas pranimit të 209 ankesave gjatë dy ditëve të fundit. Verifikimet laboratorike në Agjencinë e Metrologjisë së Kosovës kanë zbuluar se disa njehsorë kanë pasur afat të skaduar të vlefshmërisë dhe devijime kohore prej 2–3 ditësh dhe deri në 10–11 orë krahasuar me kohën reale. Megjithatë, matja e energjisë elektrike është konstatuar e saktë dhe bllombat e njehsorëve të paprekura, pa dëmtime. MINTI do t’i kërkojë Zyra e Rregullatorit të Energjisë (ZRRE) të marrë masa për devijimet e konstatuara, ndërsa Inspektorati Qendror i Mbikëqyrjes së Tregut (IQMT) do të shqiptojë gjoba ndaj KEDS-it për përdorimin e njehsorëve me afat të skaduar, sipas legjislacionit në fuqi. Ministria u bën thirrje qytetarëve të paraqesin ankesat e tyre në adresën elektronike të Departamentit për Mbrojtjen e Konsumatorit për të mundësuar verifikimin e shpejtë dhe efikas.