Importi i mishit të gjedhit dhe shpendëve nga Brazili drejt Shqipërisë do të ndalohet pas datës 3 shtator 2026, për shkak të ndryshimeve të reja në rregullat e Bashkimit Evropian që heqin Brazilin nga lista e vendeve të autorizuara për eksportin e produkteve me origjinë shtazore. Megjithatë, ngarkesat e mishit për të cilat certifikata shëndetësore veterinare është lëshuar para kësaj date do të pranohen normalisht në pikat e kontrollit kufitar, edhe nëse mbërrijnë në Shqipëri pas 3 shtatorit. Autoriteti Kombëtar i Ushqimit ka sqaruar se kjo masë vjen pas një takimi në Bruksel mes përfaqësuesve të Bashkimit Evropian dhe UECBV, ku u konfirmua se kërkesat e reja nuk zbatohen për eksportet e kryera më parë. AKU do të vazhdojë monitorimin e situatës për të garantuar sigurinë ushqimore dhe mbrojtjen e shëndetit publik në vend.