Ministri i Bujqësisë, Armend Muja, takoi përfaqësuesit e Bankës Botërore dhe projektit IRIS për të diskutuar progresin e rehabilitimit të sistemeve të ujitjes në Kosovë. Projekti, i financuar nga Bashkimi Evropian dhe i monitoruar nga Banka Botërore, ndodhet në fazën përfundimtare të implementimit dhe synon modernizimin e infrastrukturës së ujitjes për të rritur efikasitetin në sektorin bujqësor. Në takim u prezantuan rezultatet e arritura, përfshirë ndërhyrjet në sistemin e ujitjes Radoniqi–Dukagjini dhe trajnime për qindra fermerë dhe përfaqësues institucionalë. Ministri Muja theksoi rëndësinë e bashkëpunimit me partnerët ndërkombëtarë dhe shprehu interes për projekte të mëtejshme që do të mbështesin zhvillimin e infrastrukturës dhe rritjen e produktivitetit bujqësor në vend.