Ministri i Financave, Hekuran Murati, ka bërë me dije se lehonat që kanë qenë në pushim gjatë 12 muajve të fundit në sektorin publik kanë të drejtë të marrin pagën e 13-të, pasi koha e pushimit të lehonisë llogaritet si kohë pune me orar të plotë. Ai ka theksuar se nëse ndonjë grua nuk e ka marrë këtë pagesë, duhet të paraqesë ankesë te institucioni ku është e punësuar, pasi mund të ketë pasur gabime në deklarimin e statusit të punës. Murati ka shtuar se këto gabime mund të korrigjohen dhe pagesa e 13-të do t’u ekzekutohet në muajin e ardhshëm. Më 31 mars është bërë ekzekutimi i pagës së 13-të për rreth 85 mijë punonjës të sektorit publik në Kosovë, një premtim ky i kryeministrit Albin Kurti dhe i përfshirë në buxhetin e vitit 2026.