Në kuadër të Ditës Botërore të Konsumatorit më 15 mars, u zhvillua një tryezë diskutimi në Tiranë ku Rudina Lula, Drejtore e Qendrës për Ekselencë “Destiny”, theksoi nevojën për ndërgjegjësim më të madh për të gjithë aktorët e zinxhirit ushqimor, duke përfshirë institucionet, bizneset dhe konsumatorët. Ajo nënvizoi rëndësinë e bashkëpunimit dhe informimit të vazhdueshëm për të garantuar një sistem më të fortë mbrojtjeje dhe produkte më të sigurta në treg. Nga analiza e bërë në kuadër të projekteve të mbështetura nga Bashkimi Europian, Lula evidentoi se të rinjtë kanë një informacion shpesh sipërfaqësor për sigurinë ushqimore dhe mungesën e njohurive për procedurat e ankesave. Një tjetër sfidë e rëndësishme mbetet besimi i ulët te institucionet, çka kërkon përpjekje të përbashkëta për të forcuar mekanizmat institucionalë dhe për të mbrojtur më mirë të drejtat e konsumatorëve.