Në Termocentralin “Kosova B” është nënshkruar kontrata për ndërtimin e pesë impianteve për trajtimin e ujërave të ndotura dhe një objekti për magazinimin e kimikateve, në kuadër të projektit për përmirësimin e cilësisë së ujit të lumit Sitnica. Ky sistem i integruar do të trajtojë ujërat industriale, me përmbajtje vajrash, të ndikuara nga kimikatet, rrjedhjet nga depozitat e qymyrit, ujërat atmosferike dhe sanitare, duke siguruar operim të qëndrueshëm dhe të sigurt. Projekti, me vlerë rreth 12 milionë euro, financohet nga Bashkimi Evropian dhe zbatohet nga UNOPS në bashkëpunim me institucionet vendore, përfshirë Ministrinë e Ekonomisë, Ministrinë e Mjedisit dhe Korporatën Energjetike të Kosovës. Ministrja e Ekonomisë, Artane Rizvanolli, theksoi rëndësinë e këtij projekti për mbrojtjen e mjedisit dhe zhvillimin e qëndrueshëm, duke e lidhur atë me forcimin e infrastrukturës energjetike publike dhe përmirësimin e kapaciteteve gjeneruese sipas standardeve mjedisore.