Nga 1 prilli 2026 hyn në fuqi faza e dytë e liberalizimit të tregut energjetik në Kosovë, ku bizneset me mbi 50 të punësuar ose me qarkullim vjetor mbi 10 milionë euro nuk do të furnizohen më me tarifa të rregulluara nga Furnizuesi i Shërbimit Universal (KESCO). Këto biznese duhet të zgjedhin një furnizues të licencuar në tregun e hapur dhe të nisin procedurën e ndërrimit të furnizuesit të paktën 21 ditë para hyrjes në fuqi të kontratës së re. Nëse nuk zgjedhin furnizues në kohë, do të furnizohen përkohësisht nga Furnizuesi i Mundësisë së Fundit për deri në 60 ditë, pas së cilës furnizimi mund të ndërpritet. Bizneset vet-konsumatorë (prosumatorë) do të trajtohen sipas kontratave me furnizuesit e zgjedhur, pasi përfundon skema me tarifa të rregulluara. KESCO fton bizneset që plotësojnë kriteret të konfirmojnë shifrat e konsumit për të siguruar trajtim të saktë gjatë këtij procesi.