Kompania Rajonale e Mbeturinave “Ambienti” ka njoftuar se nga 10 gushti ndalohet dërgimi individual i mbeturinave nga bizneset në Deponinë Sanitare Rajonale në Sferkë të Thatë pa autorizim paraprak. Kjo masë synon rregullimin e procesit të menaxhimit të mbeturinave, duke garantuar që shërbimi i grumbullimit dhe transportit të kryhet vetëm nga KRM “Ambienti” sipas itinerareve dhe kontratave të lidhura. Bizneset janë të detyruara të përdorin shërbimin e kompanisë, të paguajnë në kohë dhe të deklarojnë saktë sasitë e mbeturinave për tarifim të drejtë. Për më tepër, KRM “Ambienti” do të shtojë kontrollet në terren dhe në hyrje të deponisë, ndërsa rastet e dërgimit pa autorizim do të trajtohen sipas ligjit në fuqi.