Nga Miniera e Trepçës është nxjerrë një kristal madhështor me përmasa 1.40 metra lartësi dhe 1.20 metra gjerësi, duke tërhequr vëmendjen për rrallësinë dhe madhështinë e tij. Nxjerrja e këtij kristali u realizua nga minatorët e Horizontit XI – Ndërrimi C, të cilët u vlerësuan për profesionalizmin, përkushtimin dhe guximin e tyre. Ky formacion mineralogjik përfaqëson jo vetëm një thesar natyror, por edhe simbolin e punës së palodhur dhe traditës shekullore të minatorëve të Trepçës. Ngjarja shënon një moment krenarie dhe respekti për të gjithë ata që çdo ditë punojnë në thellësitë e minierës për të nxjerrë pasuritë e vendit.