Është nënshkruar marrëveshja tripalëshe mes KRU “Hidroregjioni Jugor”, Ministrisë së Ekonomisë dhe Ministrisë së Kulturës, Rinisë dhe Sportit për realizimin e projektit të dislokimit të rezervuarit të ujit nga hapësira e Kalasë së Prizrenit. Projekti ka për qëllim mbrojtjen e trashëgimisë kulturore dhe arkeologjike të Kalasë, e cila është dëmtuar nga rrjedhjet e ujit nga rezervuari ekzistues që daton nga viti 1939. Përveç aspektit të ruajtjes së monumentit, projekti do të përmirësojë furnizimin me ujë të pijshëm për disa lagje të qytetit, duke rritur kapacitetin e rezervuarit nga 480 në 1000 metra kub. Vlera e investimit është rreth 450 mijë euro, ndërsa përfundimi i tij pritet brenda këtij viti, duke shënuar një ndërhyrje të domosdoshme për ruajtjen dhe valorizimin e një prej aseteve më të rëndësishme historike dhe kulturore të Kosovës.