Komuna e Obiliqit ka nisur nga 1 qershori menaxhimin lokal të mbledhjes së mbeturinave përmes Ndërmarrjes Publike Lokale “Kastrioti”, duke marrë përsipër këtë shërbim pas përfundimit të kontratës me KRM “Pastrimi”. Kryetari Halil Thaçi njoftoi se ky ndryshim u bë për shkak të dështimeve të KRM “Pastrimi” në mbledhjen e rregullt të mbeturinave dhe falimentimit të saj, duke garantuar se tashmë përgjegjësia bie drejtpërdrejt mbi komunën. Ai premtoi përmirësime në shërbim, investime në makineri dhe kushte më të mira për punëtorët që do të angazhohen në departamentin e ri, si dhe kërkoi mirëkuptim nga qytetarët për vonesat e mëparshme. Nga sot, faturat për shërbimin do të lëshohen nga NPL “Kastrioti”, ndërsa qytetarët duhet të përmbushin obligimet financiare të mëparshme ndaj KRM “Pastrimi”.