Oda Ekonomike e Kosovës ka reaguar pas vendimit të Gjykatës Komerciale që obligon Ndërmarrjen Publike Banesore të paguajë mbi 32 milionë euro dëmshpërblim për një pronë të kontestuar në qendër të Prishtinës. Oda shpreh shqetësim për ndikimin negativ që raste të tilla mund të kenë në stabilitetin ekonomik dhe besimin e sektorit privat, duke kërkuar që këto çështje të trajtohen me përgjegjësi të lartë institucionale dhe pa ndikime politike. Në reagim theksohet nevoja për një sistem drejtësie të pavarur dhe të paanshëm, si dhe për një diskurs publik të matur dhe të bazuar në fakte, që ruan integritetin e bizneseve dhe siguron një ambient të parashikueshëm për investime. Oda i bën thirrje institucioneve dhe aktorëve politikë të shmangin çdo ndërhyrje në drejtësi dhe të kontribuojnë në krijimin e një klime të qëndrueshme për zhvillim ekonomik.