Oda Ekonomike e Kosovës i ka bërë thirrje Qeverisë që të ndërmarrë hapa të menjëhershëm për përfshirjen e vendit në projektet rajonale të gazit natyror, duke theksuar rëndësinë e këtij momenti për transformimin energjetik në Ballkanin Perëndimor. Marrëveshjet e fundit ndërmjet Bosnje e Hercegovinës dhe Kroacisë për terminalin LNG në Krk, si dhe ajo në Shqipëri për gazin e lëngshëm natyror, të mbështetura nga Shtetet e Bashkuara, tregojnë se rajoni po ripozicionohet në hartën energjetike të Evropës. Kreu i Odës Ekonomike, Lulzim Rafuna, ka theksuar se Kosova nuk ka luksin të mbetet jashtë këtyre projekteve, pasi ato janë jetike për sigurinë energjetike, zhvillimin ekonomik dhe tërheqjen e investimeve strategjike. Oda kërkon që përfshirja e Kosovës të bëhet në përputhje me standardet e Bashkimit Evropian dhe me transparencë, duke intensifikuar dialogun me partnerët rajonalë dhe ndërkombëtarë për të siguruar një rol aktiv në të ardhmen energjetike të rajonit.