Një koalicion i organizatave joqeveritare në Kosovë i ka bërë thirrje Qeverisë që në rishikimin e Buxhetit 2026 dhe Kornizës Afatmesme të Shpenzimeve të adresohen pengesat që kufizojnë pjesëmarrjen e grave në tregun e punës. Sipas hulumtimeve të Rrjetit të Grave të Kosovës dhe Caritasit Zviceran, 74% e grave mbeten jashtë fuqisë punëtore, ndërsa pjesëmarrja e tyre është vetëm 26%, shumë më e ulët se ajo e burrave. Koalicioni kërkon miratimin e një ligji të ri për punën që do të përputhet me Direktivën e BE-së për balancën punë-jetë, investime në shërbimet e kujdesit për fëmijët, përmirësimin e transportit publik në zonat rurale dhe institucionalizimin e buxhetimit të përgjegjshëm gjinor.