Aleanca Kosovare e Bizneseve (AKB) ka shprehur shqetësim për efektin ekonomik të pagës së 13-të për sektorin publik, duke theksuar se 65 milionë euro të shpenzuara nuk kanë sjellë ndikim të qëndrueshëm në ekonominë vendore. Sipas AKB-së, rreth 40% e këtyre mjeteve janë shpenzuar gjatë festave dhe fundjavave jashtë Kosovës, kryesisht në Shqipëri, Maqedoni të Veriut, Mal të Zi dhe Greqi, duke bërë që një pjesë e konsiderueshme e parasë publike të mos ndikojë në zhvillimin ekonomik të brendshëm. AKB vlerëson se këto fonde do të kishin pasur një efekt më të madh nëse do të ishin orientuar drejt mbështetjes së sektorit privat, rritjes së prodhimit vendor, subvencionimit të investimeve dhe përkrahjes së bizneseve që krijojnë vende të reja pune. Në reagim, AKB thekson se trajtimi i pabarabartë mes sektorit publik dhe atij privat krijon disbalancë në treg dhe dëmon konkurrencën e drejtë, duke kërkuar politika që mbajnë kapitalin brenda vendit dhe nxisin zhvillim ekonomik të qëndrueshëm në kohë sfidash ekonomike dhe rritjeje të çmimeve.