Paga e 13-të, që do të jepet për herë të parë këtë vit për punonjësit e sektorit publik në Kosovë, pritet të jetë një ndihmë e mirëseardhur, por jo një zgjidhje afatgjatë përballë rritjes së çmimeve dhe inflacionit prej rreth 6 për qind. Sindikatat theksojnë se kjo pagesë shtesë do të “shkrihet” shpejt për nevojat e përditshme, pasi çmimet e karburanteve dhe energjisë elektrike janë rritur ndjeshëm dhe pritet që tarifat e energjisë të rriten edhe më tej. Kryetari i Sindikatës së Bashkuar të Arsimit, Rrahman Jasharaj, dhe ai i Sindikatës së Zjarrfikësve, Muharrem Beka, shprehen se paga e 13-të është një ndihmë e vogël dhe nuk mjafton për të përballuar shpenzimet mujore të familjeve të tyre.