Komuniteti i Bizneseve Kosovaro-Gjermano-Zvicerane (KGS) dhe CEO Shpk kanë nënshkruar një Memorandum Bashkëpunimi, duke krijuar një partneritet strategjik për të fuqizuar lidhjet ekonomike ndërmjet Kosovës, diasporës shqiptare dhe komunitetit ndërkombëtar të biznesit. Ky bashkëpunim synon të hapë mundësi të reja investimesh, shkëmbimi përvojash dhe zhvillimi i rrjeteve profesionale, duke organizuar forume, panaire dhe takime B2B që lidhin sektorin privat me investitorët dhe institucionet relevante. Presidenti i KGS-së, Shkelzen Jusaj, theksoi rëndësinë e këtij hapi për afërsinë e diasporës me mundësitë ekonomike në Kosovë dhe krijimin e partneriteteve të qëndrueshme. Drejtori i CEO Shpk, Bekim Xhafa, vuri në dukje se bashkëpunimi do të ndihmojë në zgjerimin e rrjetit të partnerëve strategjikë dhe krijimin e platformave konkrete për bizneset dhe profesionistët shqiptarë brenda dhe jashtë vendit.