Ministri i Ekonomisë dhe Punës, Besar Durmishi, njoftoi se përgatitja e shportës mesatare të konsumit është në fazën përfundimtare, ndërsa afati për miratimin e saj është 30 qershori. Shporta është shqyrtuar nga anëtarët e Këshillit Ekonomik – Social (KES), të cilët kanë dhënë vërejtje dhe kritika që aktualisht po përpunohen nga grupet e punës. Në mbledhjen e ardhshme të KES, shporta do të vendoset në rend dite për diskutim dhe, nëse të gjitha palët bien dakord, do të publikohet dhe do të jetë në dispozicion për qytetarët. Ministria e Ekonomisë po fokusohet gjithashtu në agjendën e reformave dhe ka siguruar mbështetje financiare prej mbi 11 milionë denarë për ndërmarrjet mikro, të vogla dhe të mesme, si dhe për zejtarët.