Ministrja në detyrë e Ekonomisë, Artane Rizvanolli, njoftoi rehabilitimin e pesë vagonëve të ndërmarrjes “Trainkos” me një investim prej 423 mijë euro, duke synuar përmirësimin e transportit hekurudhor dhe shërbimeve për qytetarët. Gjatë prezantimit të vagonëve të rinovuar, Rizvanolli theksoi se ky investim do të ofrojë një transport publik më modern, më të sigurt dhe më efikas. Secilit vagon i është zgjatur jetëgjatësia operacionale për rreth 800 mijë kilometra, duke rritur sigurinë dhe cilësinë e shërbimit. Kryeshefi Ekzekutiv i “Trainkos”, Agron Statovci, raportoi për përmirësime të mëdha në kosto, shërbime operative dhe të ardhura që prej vitit 2021, duke theksuar se vënia në funksion e këtyre vagonëve do të rrisë kapacitetet dhe do të ndihmojë në zhvillimin e rrjetit hekurudhor në Kosovë.