Komuna e Prishtinës ka hapur një tender me vlerë mbi 3.9 milionë euro për shërbime pastrimi dhe mirëmbajtjeje në 35 objekte edukativo-arsimore, përfshirë shkolla fillore, të mesme dhe çerdhe. Kontrata do të zgjasë 32 muaj dhe është e ndarë në dy lote, ku për Lotin 1 kërkohen të paktën 149 punonjës dhe për Lotin 2 76 punonjës, me pjesë të stafit të përzgjedhur nga autoriteti kontraktues. Operatorët ekonomikë duhet të sigurojnë personelin, pajisjet, materialet pastruese, dhe të respektojnë standardet e larta të sigurisë në punë, duke pajisur punëtorët me uniforma dhe mjete mbrojtëse sipas standardeve evropiane. Tenderi përfshin procedura të detajuara për pastrimin dhe mirëmbajtjen e objekteve, duke garantuar shërbime deri në 7 ditë në javë dhe në raste të veçanta edhe jashtë orarit, me qëllim përmirësimin e kushteve higjienike në shkolla dhe çerdhe të kryeqytetit.