Nga sot ka hyrë në fuqi udhëzimi i ri administrativ që rregullon procesin e Certifikatës së Kompetencës Profesionale (CKP) në Kosovë, duke zhbllokuar procedurat për shoferët fillestarë dhe operatorët e transportit ndërkombëtar të mallrave. Ministri në detyrë i Infrastrukturës, Dimal Basha, njoftoi se vendimi i jep fund vonesave në pajisjen me certifikata dhe mundëson rifillimin e rregullt të aplikimeve. Ai theksoi se pas një periudhe pune intensive është arritur funksionalizimi i plotë i procesit të certifikimit, duke garantuar që aplikuesit të marrin dokumentacionin në kohë. Ministria e Infrastrukturës dhe Transportit është angazhuar për trajtim efikas dhe prioritar të aplikimeve, ndërsa ministri falënderoi shoferët dhe operatorët për durimin gjatë periudhës së bllokimit.