Lidhja e Bizneseve të Kosovës ka reaguar ndaj mënyrës së komunikimit politik mbi kontrollin dhe sigurinë e produkteve vendore, duke theksuar se nuk kundërshton inspektimet profesionale, por pompozitetin dhe deklarimet që dëmtojnë imazhin e prodhuesve vendorë. Sipas LBK-së, këto deklarime krijojnë një klimë të panevojshme dyshimi dhe frike ndaj produkteve vendore, duke cenuar besimin e konsumatorëve dhe reputacionin e kompanive që kanë investuar në teknologji dhe standarde të larta. Lidhja fton ministrin që të vizitojë prodhuesit, të dëgjojë shqetësimet e tyre dhe të bashkëpunojë për të promovuar dhe zhvilluar prodhimin vendor në mënyrë të qëndrueshme. Ajo nënvizon se kontrolli duhet të shoqërohet me mbështetje, edukim dhe hapje tregjesh, duke e konsideruar prodhuesin vendor partner të shtetit dhe jo objekt sulmesh politike.