Aleanca Kosovare e Bizneseve (AKB) ka dënuar ashpër gjuhën fyese dhe përçmuese ndaj prodhuesve vendorë, të cilët protestuan për problemet reale ekonomike dhe kërkuan funksionalizimin e institucioneve. AKB thekson se prodhuesit nuk janë “prodhues të së keqes”, por janë ata që krijojnë vende pune, paguan tatime dhe investojnë në mirëqenien e qytetarëve. Organizata i bën thirrje skenës politike të ndalojë përdorimin e bizneseve si mjet për përplasje politike dhe të respektojë të drejtën e prodhuesve për të protestuar dhe kritikuar qeverinë pa u sulmuar. AKB premton mbrojtje të vendosur ndaj çdo gjuhe denigruese ndaj prodhuesve, duke theksuar se interesat e tyre janë interesat e ekonomisë së Kosovës.