Ministrja e Industrisë, Ndërmarrësisë, Tregtisë dhe Inovacionit, Mimoza Kusari Lila, prezantoi projektligjin për masat e përkohshme të produkteve themelore në raste të destabilizimit të tregut, me qëllim mbrojtjen e konsumatorëve dhe interesit publik. Ky projektligj përcakton kornizën ligjore për vendosjen e masave proporcionale, duke përfshirë caktimin e marzhës tregtare dhe çmimit maksimal të lejuar nga operatorët ekonomikë. Për vendimmarrjen do të themelohet një bord i pavarur, i emëruar nga Kuvendi, i cili do të raportojë përpara komisionit përkatës, duke siguruar kështu një mekanizëm institucional dhe procedural të ri për menaxhimin e situatave të luhatjeve të çmimeve. Hartimi i projektligjit është bërë në përputhje me rekomandimet e Gjykatës Kushtetuese dhe në bashkëpunim me institucione publike dhe përfaqësues të sektorit privat, duke u përfshirë edhe në agjendën legjislative të qeverisë për vitet 2026-2028.