Një studim i Bankës Federale të Rezervës në New York ka zbuluar se puna nga distanca pas pandemisë është një nga shkaqet kryesore të rritjes së papunësisë te të rinjtë e diplomuar, duke tejkaluar ndikimin e inteligjencës artificiale. Kompanitë po tregojnë hezitim për të punësuar të rinj pa përvojë në pozita që mund të kryhen nga larg, për shkak të vështirësive në trajnimin dhe mentorimin jashtë zyrës. Analiza tregon se papunësia në profesionet që mund të kryhen në mënyrë remote është rritur mes viteve 2022–2024, ndërsa për punëtorët më të vjetër në të njëjtat fusha ka pasur një rënie të lehtë. Ky fenomen ka krijuar një hendek të dukshëm mes brezave, duke kontribuar në rreth dy të tretat e rritjes së papunësisë së të rinjve pas pandemisë, ndërkohë që ndikimi i inteligjencës artificiale në këtë trend është i kufizuar.