Kryetari i Sindikatës së Pavarur të Sektorit Privat të Kosovës, Jusuf Azemi, ka bërë me dije se një numër i madh punëtorësh nuk kanë marrë ende 100 eurot e ndara nga Qeveria, duke ngritur shqetësime për vonesa në shpërndarje. Ai theksoi se vonesat mund të jenë shkaktuar edhe nga procedurat bankare, ndaj nuk është dhënë ende një raport përfundimtar. Sipas Azemit, disa punëtorë rrezikojnë të mbeten pa këtë përfitim për shkak të mungesës së kontratave të punës dhe mospagesës së kontributeve nga disa kompani. Ai paralajmëroi më parë se jo të gjithë punëtorët do të përfitojnë nga kjo masë, duke theksuar se mbi 10 mijë punëtorë mund të mbeten jashtë përfitimit për shkak të këtyre problemeve.