Qeveria e Maqedonisë së Veriut ka miratuar listën e parë prioritare që përfshin 41 propozim-projekte kapitale për vitin 2027. Kjo listë është përgatitur pas një procesi të detajuar vlerësimi nga Ministria e Financave dhe Komiteti i Investimeve Publike, duke marrë parasysh rëndësinë strategjike, cilësinë e dokumentacionit dhe gatishmërinë për zhvillim të mëtejshëm të projekteve. Projektet përfshijnë fusha të ndryshme si infrastruktura, arsimi, shëndetësia, energjetika, dixhitalizimi, bujqësia dhe menaxhimi i ujërave. Megjithatë, përfshirja në këtë listë nuk garanton financimin apo zbatimin e projekteve, pasi vendimet për financim do të merren më vonë në kuadër të procesit buxhetor dhe prioriteteve të Qeverisë.