Ministria e Mjedisit dhe Planifikimit Hapësinor ka njoftuar se për herë të parë qytetarët do të kenë mundësi të dorëzojnë mbeturinat e tyre në deponitë sanitare të Kompanisë për Menaxhimin e Deponive në Kosovë. Pranimi i mbeturinave do të bëhet në deponitë e Mirashit, Landovicës, Velekincës dhe Dumnicës çdo të shtunë nga ora 08:00 deri në 16:00, me një tarifë prej 10.31 euro për ton, pagesa që do të kryhet vetëm me kartelë bankare. Do të pranohen vetëm mbeturinat e parrezikshme sipas legjislacionit në fuqi, ndërsa mbeturinat e rrezikshme, toksike, spitalore dhe të ndaluara me ligj nuk do të pranohen. Ministria thekson se çdo hedhje e mbeturinave në vende të papërshtatshme do të trajtohet me tolerancë zero dhe do të ndëshkohet sipas ligjit, duke e konsideruar mbrojtjen e mjedisit si përgjegjësi të secilit qytetar.