Kryeministri Edi Rama deklaroi se ekonomia shqiptare po vijon një rritje të qëndrueshme dhe pritet të shënojë një rritje prej rreth 32% të Prodhimit të Përgjithshëm Bruto deri në vitin 2030, sipas parashikimeve të institucioneve financiare ndërkombëtare. Ai theksoi se kjo ecuri pozitive nuk është rastësi, por rezultat i reformave të guximshme dhe të shumëpritura që kanë forcuar themelet e ekonomisë shqiptare. Rritja mbështetet në sektorë në zhvillim të vazhdueshëm dhe shoqërohet me një rritje graduale të pagave, jo vetëm në sektorin publik, por edhe në atë privat, veçanërisht për punonjësit me kualifikime dhe zanate. Rama bëri thirrje për shqiptarët që jetojnë jashtë vendit që të shikojnë me optimizëm mundësinë e kthimit në Shqipëri, duke theksuar se vendi sot ofron më shumë mundësi ekonomike dhe cilësi jetese, si dhe ngrohtësinë e shtëpisë.