Ministria e Bujqësisë, Pylltarisë dhe Zhvillimit Rural do të publikojë brenda vitit një udhërrëfyes kombëtar për përafrimin me standardet e Bashkimit Evropian në fushën e sigurisë ushqimore dhe shëndetit të kafshëve, me afate konkrete dhe institucione përgjegjëse. Ministri Armend Muja njoftoi se brenda 12 muajve do të reformohet sistemi i inspektimeve duke kaluar nga kontrollet formale në ato të bazuara në rrezik, për të rritur efektivitetin dhe për të ulur barrën për bizneset që respektojnë rregullat. Një tjetër prioritet është ndërtimi i një sistemi digjital të plotë të gjurmueshmërisë, i cili do të mundësojë ndjekjen e çdo produkti nga ferma deri në treg, duke rritur transparencën dhe besimin në zinxhirin ushqimor. Muja theksoi rëndësinë e qasjes “One Health” që lidh shëndetin e njerëzve, kafshëve dhe mjedisit, si dhe nevojën për bashkëpunim me Bashkimin Evropian dhe partnerët lokalë për përshpejtimin e reformave dhe zhvillimin e sektorit bujqësor si një mundësi për punësim, zhvillim rural dhe rritje të eksportit.