Çmimet e naftës kanë pësuar një rënie të ndjeshme pas njoftimit për hapjen e Ngushticës së Hormuzit për anijet tregtare. Ministri i Jashtëm iranian Abbas Araghchi bëri të ditur se ngushtica do të jetë e hapur për periudhën e mbetur të armëpushimit, duke lejuar kalimin e lirë të anijeve tregtare në këtë rrugë strategjike detare. Pas këtij lajmi, çmimi i naftës Brent ra me mbi 8% në rreth 91 dollarë për fuçi, ndërsa nafta amerikane WTI u ul mbi 9%, në rreth 85 dollarë për fuçi. Kjo rënie vjen pas një periudhe tensioni ku çmimet e naftës ishin arritur mbi 100 dollarë për fuçi, duke reflektuar ndikimin e drejtpërdrejtë të zhvillimeve gjeopolitike në tregjet globale të energjisë.