Kompania gjermane Rheinmetall po forcon praninë e saj në industrinë e mbrojtjes me një investim prej 270 milionë eurosh për ndërtimin e një qendre të re logjistike dhe teknologjike në aeroportin e Kassel, në landin e Hesse-s. Qendra e re, që do të shtrihet në rreth 30,000 metra katrorë dhe pritet të jetë funksionale në vitin 2027, do të përfshijë edhe një qendër testimi për dronët, ku do të maten shpejtësia dhe parametrat e fluturimit. CEO i Rheinmetall, Armin Papperger, theksoi rëndësinë e zhvillimit të shpejtë të modeleve të reja të dronëve, duke lidhur këtë me mësimet nga lufta në Ukrainë, dhe nënvizoi nevojën për një kombinim të sistemeve të ndryshme mbrojtëse, siç kërkon NATO. Me këtë projekt, Kassel synon të mbetet një prej qendrave kryesore të industrisë europiane të mbrojtjes, duke punësuar aktualisht rreth 2200 persona dhe duke zgjeruar kapacitetet për prodhimin e tankeve dhe dronëve.