Njësia A3 e Termocentralit “Kosova A” është rikthyer me sukses në operim dhe është sinkronizuar me sistemin elektroenergjetik rreth orës 10:00 të mëngjesit, pas sanimit të rrjedhjeve në sistemin gypor të kaldajës dhe përfundimit të aktiviteteve teknike. KEK thekson se ky rikthim u arrit falë angazhimit dhe profesionalizmit të stafit teknik, dhe aktualisht njësia operon në gjendje stabile, duke forcuar sigurinë e furnizimit me energji elektrike në vend. Paralelisht, Korporata Energjetike e Kosovës po vazhdon zbatimin e projekteve të mëdha investive, përfshirë modernizimin e njësive në TC Kosova B dhe zhvillimin e një parku solar me kapacitet prej 100 MW. Këto investime synojnë krijimin e kapaciteteve më moderne dhe më të qëndrueshme, duke garantuar një të ardhme energjetike më të sigurt dhe më të gjelbër për Kosovën.