Ministria e Financave e Maqedonisë së Veriut po përgatit ndryshime ligjore të rëndësishme në Ligjin e Shoqërive Financiare, me qëllim përforcimin e mbikëqyrjes dhe vendosjen e standardeve më të larta në këtë sektor. Ndryshimet parashikojnë krijimin e bordeve të brendshme të detyrueshme në çdo shoqëri financiare, si bordi i revizionit të brendshëm dhe bordi i risqeve të huave, si dhe kontroll më të rreptë për hapjen e hapësirave të reja afariste me pëlqim paraprak nga Ministria e Financave. Gjithashtu, do të rritet kapitali themelor i shoqërive dhe do të ndalohet përdorimi i pagesave me para të gatshme, duke i detyruar transaksionet të kryhen përmes xhirollogarisë bankare për të parandaluar keqpërdorimet financiare. Ministrja Gordana Dimitrieska Koçoska theksoi se këto masa vijnë pas kontrolleve që zbuluan dobësi dhe paqartësi në rregulloren aktuale, dhe synojnë mbrojtjen më të madhe të qytetarëve dhe stabilitetin e sektorit financiar.