Kuvendi miratoi ndryshime të rëndësishme në Ligjin e Lizingut Financiar që synojnë rritjen e transparencës, mbrojtjen e fuqishme të shfrytëzuesve dhe përmirësimin e mbikëqyrjes së kompanive të lizingut. Ndryshimet përfshijnë kontrata më të qarta, mundësi shlyerjeje parakohshme pa kosto shtesë dhe kontroll më të madh mbi përdorimin e lëndës së lizingut si kolateral. Ofruesit e lizingut do të publikojnë raportet financiare vjetore në faqet e tyre, duke mundësuar një pasqyrë më të mirë për klientët. Gjithashtu, rritet vlera minimale e kapitalit të kompanive dhe forcohen kriteret për integritetin dhe reputacionin e themeluesve, në përputhje me standardet evropiane dhe rekomandimet kundër pastrimit të parave.